За успишни орґанизовани духовий живот єдней парохиї треба мац и место за зазберованє и молитву, за окончованє богослуженьох; з єдним словом - треба мац церкву! Руснаци-грекокатолїки у Новим Садзе, розуми ше, спочатку не мали свою церкву. Зазберовали ше, модлєли и богослуженя окончовали у католїцкей церкви єрменского обряду, котра у Новим Садзе була збудована ище 1746. року. Правда, нє зошицким вона одвитовала обряд­ним предписаньом, бо нє мала иконостас, але дочасно задовольовала потреби новооснованей парохиї и єй вирнїкох.

Недостаток власней церкви, по словох пароха Силвестра Бубановича, була причина пре котру дзепоєдни одходзели до православней церкви. Маюци то на уваги, парох Бубанович глєдал од влади помоц за будоване власней церкви. На основи його молби Намиснїцка рада 7. марца 1785. року замодлєла новосадски Маґистрат же би послал обсяжнєйши звит о можлївосци будованя грекокатолїцкей церкви у Новим Садзе. Маґистрат виявел же вон нє може зношиц други терхи окрем за православну и римокатолїцку церкву у городзе. Намиснїцка рада ше ище раз обрацела ґу Маґистрату и замодлєла го же би ше догварел зоз грекокатолїцким парохом Силвестром Бубановичом на яки способ ше можу пренайсц и жридла за будоване церкви и парохиялного дому и най ше поднєше обсяжнєйши звит о чишлє вирних грекокатояїцкей парохиї у Новим Садзе и о їх занїманю. Так ше ствар коло будованя церкви за одредзени час змирела; парохия нє мала потребни средства бо парохиянє були малочислени и худобни.

Намиснїцка рада, заш лєм, вимагала од Маґистрата Нового Саду же би ше видвоєла жем дзе ше збудує грекокатолїцка церква и парохиялни дом. У фонду за будоване уж ест 1.500 форинти, хтори за тот циль подаровала царица Мария Терезия.

Маґистрат 6. марца 1786. року послал Намиснїцкей ради плани за грекокатолїцку церкву и парохиялни дом. Ту ше тиж так спомина же Маґистрат дознал од пароха же у фонду за будоване церкви ест 1.500 форинти и же маю 300 форинти рочней помоци, але же ше будзе глєдац средства и зоз маси средствох покойного крижевского владики Василия Божичковича, хтори обецал же да прилог за будоване тей церкви. Намиснїцка рада тримала же 54 парохиянє грекокатолїцкей парохиї у Новим Садзе - премале число, а постояци фонд за будоване церкви и парохиялного дому нєдостаточни, прето за одредзени час треба одложиц тото питане. Потамаль фонд треба звекшовац, а нє треба ше бац же Руснаци буду преходзиц на православну виру, бо можу свойо богослуженя отримовац у єрменскей церкви.

Грекокатолїцка парохия у Новим Садзе нє лєм же нє мала досц средства за будоване церкви и парохиялного дому але нє могла анї витримовац свойого пароха. Видатки грекокатолїцкого пароха були векши од його приходох. Нє чудо же приходи грекокатолїцкей парохиї у Новим Садзе були таки мали, кед ше зна же вона мала мало парохиянох, а то углавном були слугове, служнїци и наднїчаре хтори ше лєдво сами могли витримовац зоз свойого заробку.

Число Руснацох у Новим Садзе, гоч досц помали, заш лєм ше нєпреривно звекшовало. Так при концу XVIII або на початку XIX вику грекокатолїцка парохия у Новим Садзе мала 335 парохиянох.