НА ПОЧАТКУ

Приблїжує ше 1995. рок, а то рок кед означиме нє гоч яки ювилей, алє 250 роки од приселєня Русинох на широки простори Бачки, а вец и Сриму, и Славониї, як и 250 роки живота на тих просторох. Таку рочнїцу, вшелїяк, треба означиц зоз рижнима манифестациями: духовнима, народнима, мистецкима, спортскима, видавательнима.. Тото остатнє, видавательне означованє того ювилея, видзи ми ше, уж почало. То, вшелїяк, монументална кнїжка п. проф. др Юлияна Тамаша - Руски Керєстур ~ история и літопис. Но, то наисце лєм початок! Сам ювилей постава якишик импулс, конкретна причина и мотив, же би ше праве тераз написало и видало цо вецей того цо збогаци нашу науку, мистецку творчосц, публицистику, духовни потреби чловека. Можебуц то требало и скорей зробиц? Алє, тераз, так повесц, то наш императив!

То були тоти идеї котри ме водзели и приведли до прешвеченя, а тиж и заохоцели, же бим за видаване порихтал рижни мойо тексти, котри уж написани, або су лєм у скицох, а котри ше роками громадзели и чекали, можебуц, тот час и таки импулс. Зоз своїма младима приятелями - Миколом Шантом, Владимиром Римаром и Миколом М. Цапом, надумали зме, з помоцу Божу и з помоцу добрих людзох, порушац Библиотеку "Мемориял 250", у котрей би вишли тоти мойо роботи на духовни и историйни теми, алє и роботи других авторох, котри ше тематично уклопюю до тих рамикох. Перша кнїжка у тей Библиотеки то праве тота - Дар мудросци-радио-писма свяшенїка. То лєм перши том, бо ше радио-писма и далєй читаю каждей нєдзелї на поладнє, такой после радио-новинох. Кед ше назбера заш одредзене число тих писмох, будзе видати и други том.

Кнїжочки у Библиотеки "Мемориял 250" буду харак-теристични по тим же то буду мали кнїжочки, найвецей до сто боки. Як таки, вони буду приступни нашому чловекови. Куповане їх нє охаби вельки поїшпдки у нєшкайшим ценким буджету обисца. Попри тей своєй добрей страни, треба буц порихтани и на цошка цо нє такой таке добре – дзепоєдни кнїжки буду виходзиц у вецей томох. Так, наприклад, Священїки Осєцкого викарията, а то биографиї 219 священїкох (медзи нїма и єденац владикох), котри службовали або походза зоз териториї Осєцкого викарията през 250 роки, заплановани на пейц або шейсц, а можебуц и седем таки томи, таки часци. Шицко будзе завишиц и од числа илустрацийох. Або, Живот святих - дванац томи, дванац часци, за кажди мешац по єден. Кед ше пощесци и шицко цо заплановане видзе, годна то буц библиотека и од 100 кнїжки.

То нашо плани, то нашо жаданя, а як будзе- завиши од вельо того. У велькей мири и од вас, мили нашо читане. Ваша зацикавеносц, куповане и читане тих кнїжочкох - то ключ котри одмика кажди замок. Наздаваме ше же одомкнєце и замок котри отвори дзвери през котри кнїжочки Библиотеки "Мемориял 250" виду и войду до нашого народу. И же буду длуго виходзиц и уходзиц... Глїбоко вериме до того!

Нови Сад, 12. май 1993.

о. Роман Миз: На початку...............3

о. Владислав Варґа: Уводне слово..........5

Дар мудросци — радио-писма священїка . . 7-95